Qayda 9. Qayda pozuntusu

Prinsip

Qayda pozuntusuna yol verən oyunçuya xəbərdarlıq edilməli və ya sarı kart göstərilməli, yaxud həmin oyunçu oyundan qovulmalıdır.

Maneə

1. Oyunçu və rəqib topa doğru qaçarkən onların heç biri digərini çiyin-çiyinə təmasdan başqa üsulla vurub kənarlaşdıra və ya itələyə bilməz.

2. Oyundankənar vəziyyətdə olan oyunçu rəqibə qəsdən mane olmamalı və ya oyuna müdaxilə etməməlidir.

3. Oyunçu rəqibin top daşıyan oyunçuya tutuş etməsinə və ya tutuş etməyə cəhd göstərməsinə qəsdən mane olmamalıdır.

4. Oyunçu topa sahiblik uğrunda mübarizədən başqa üsulla rəqibin topu oynamaq imkanının qarşısını qəsdən almamalıdır.

5. Top daşıyan oyunçu rəqibə mane olmaq üçün oyundankənar vəziyyətdə olan komanda yoldaşına qəsdən tərəf qaçmamalıdır.

6. Oyunçu top ölü olarkən rəqibə mane olmamalı və ya hər hansı şəkildə müdaxilə etməməlidir.

Cəza: cərimə.

Ədalətsiz oyun

7. Oyunçu aşağıdakıları etməməlidir:

a. Oyunun hər hansı qaydasını qəsdən pozmaq.

b. Topu qol və ya əllə oyun ərazisindən qəsdən vurmaq, qoymaq, itələmək və ya atmaq.

c. Matç rəsmilərində rəqibin qaydanı pozduğu təsəvvürünü yarada biləcək hər hansı hərəkət etmək.

Cəza: cərimə.

d. Vaxtı uzatmaq. Cəza: sərbəst zərbə.

Təkrarlanan qayda pozuntuları

8. Komanda eyni qayda pozuntusunu təkrar-təkrar etməməlidir.

9. Oyunçu qaydaları təkrar-təkrar pozmamalıdır.

Cəza: cərimə.

10. Eyni komandanın müxtəlif oyunçuları eyni qayda pozuntusunu təkrar etdikdə hakim komandaya ümumi xəbərdarlıq edir. Komanda bundan sonra həmin pozuntunu yenidən etdikdə hakim təqsirkar oyunçuya və ya oyunçulara sarı kart göstərir.

Təhlükəli oyun

11. Oyunçular dirsək və ya saidlə irəli atılmaq, tutuş edən oyunçuya doğru və ya onun üzərindən tullanmaq da daxil olmaqla, başqalarına qarşı ehtiyatsız və ya təhlükəli hərəkətlər etməməlidirlər.

12. Oyunçu heç kimi fiziki və ya şifahi şəkildə təhqir etməməlidir. Fiziki təhqirə, bunlarla məhdudlaşmamaqla, dişləmək, yumruq vurmaq, gözə və ya göz ətrafına toxunmaq, qolun hər hansı hissəsi, çiyin, baş və ya dizlə zərbə vurmaq, tapdalamaq, ayaqlamaq, badalaq vurmaq və ya təpik vurmaq daxildir.

13. Oyunçu rəqibə erkən, gec və ya təhlükəli tutuş etməməlidir. Təhlükəli tutuşa, bunlarla məhdudlaşmamaqla, baş nahiyəsinə təmasla nəticələnən tutuş və ya tutuş cəhdi, yaxud oyunçulardan hər hansı biri açıq sahədə oynayarkən müvafiq cəza xəttindən yuxarı tutuş və ya tutuş cəhdi daxildir. Bax: Qayda 14.1.

14. Oyunçu topa sahib olmayan rəqibə tutuş etməməlidir.

15. Skram, rak və ya mol istisna olmaqla, topa sahib olmayan oyunçu topa sahib olmayan rəqibi saxlamamalı, itələməməli, vurub kənarlaşdırmamalı və ya ona mane olmamalıdır.

16. Oyunçu top daşıyan rəqibi tutmağa cəhd göstərmədən onu vurub yıxmamalıdır.

17. Oyunçu ayaqları yerdən üzülmüş rəqibə tutuş etməməli, onu vurmamalı, çəkməməli, itələməməli və ya tutmamalıdır.

18. Oyunçu rəqibi yerdən qaldıraraq onun başının və ya bədəninin yuxarı hissəsinin yerə toxunacağı şəkildə buraxmamalı və ya yerə doğru itələməməlidir.

19. Skramda təhlükəli oyun:

a. Skramın ön xətti rəqibdən aralı məsafədə qurularaq onun üzərinə atılmamalıdır.

b. Ön xətt oyunçusu rəqibi çəkməməlidir.

c. Ön xətt oyunçusu rəqibi qəsdən yerdən qaldırmamalı və ya skramdan yuxarı məcbur etməməlidir.

d. Ön xətt oyunçusu skramı qəsdən çökdürməməlidir.

20. Rakda və ya molda təhlükəli oyun:

a. Oyunçu raka və ya mola atılmamalıdır. Atılma raka və ya mola daxil olan başqa oyunçuya bağlanmadan edilən hər hansı təması əhatə edir.

b. Oyunçu rəqiblə çiyin xəttindən yuxarı təmas etməməlidir.

c. Oyunçu rakı və ya molu qəsdən çökdürməməlidir.

d. Oyunçu top qazanan oyunçunu dizindən və ya ayağından tutmaq da daxil olmaqla, geriyə itələməklə tutuş sahəsindən uzaqlaşdıra bilər, lakin rəqibi fırlatmamalı, çəkməməli və ya burmamalıdır.

e. Oyunçu öz ağırlığını rəqibin üzərinə salmamalı və ya onun aşağı ətraflarını hədəfə almamalıdır.

21. Oyunçu qisas almamalıdır.

22. Komandalar flayinq vecdən istifadə etməməlidirlər.

23. Oyunçu top daşıyan oyunçunun əlindəki topa təpik vurmağa cəhd etməməlidir.

24. Top daşıyan oyunçu həddindən artıq güc tətbiq etməmək şərtilə rəqibi əllə dəf edə bilər.

Cəza: cərimə.

25. Oyunçu topu indicə ayaqla vurmuş rəqibi qəsdən vurmamalı, ona mane olmamalı və ya gec tutuş etməməlidir.

Cəza: cərimə. Qaydanı pozmayan komanda cəriməni aşağıdakı yerlərdən birində yerinə yetirməyi seçir:

a. Qayda pozuntusunun baş verdiyi yerdə; və ya

b. Topun yerə düşdüyü və ya növbəti dəfə oynanıldığı yerdə, lakin aut xəttindən 15 metrdən yaxın olmayaraq; və ya

c. Top birbaşa auta vurulduqda, aut xəttini keçdiyi yerə uyğun olaraq 15 metrlik xətt üzərində; və ya

d. Top cəhd sahəsində yerə düşdükdə, cəhd sahəsi autuna çıxdıqda, yaxud ölü top xəttinə və ya onun arxasına keçdikdə, topun cəhd xəttini keçdiyi yerə uyğun olaraq cəhd xəttindən beş metr aralıda və aut xəttindən ən azı 15 metr məsafədə; və ya

e. Top qapı dirəyinə və ya üst tirə dəydikdə, topun yerə düşdüyü yerdə.

Böyüt ↗

26. Açıq oyunda istənilən oyunçu komanda yoldaşını qaldıra və ya ona dayaq ola bilər. Bunu edən oyunçular top tərəflərdən biri tərəfindən qazanılan kimi həmin oyunçunu təhlükəsiz şəkildə yerə endirməlidirlər. Cəza: sərbəst zərbə.

İntizamsızlıq

27. Oyunçu yüksək idmançı davranışına zidd hərəkət etməməlidir.

28. Oyunçular hakimin səlahiyyətinə hörmət etməlidirlər. Onlar hakimin qərarlarına etiraz etməməli və hakim oyunu dayandırmaq üçün fit çaldıqda dərhal oyunu dayandırmalıdırlar.

Cəza: cərimə.

Sarı və qırmızı kartlar

29. Oyunçuya xəbərdarlıq edilərək 10 dəqiqəlik oyun vaxtı müddətinə müvəqqəti kənarlaşdırıldıqda hakim ona sarı kart göstərir. Həmin oyunçu daha sonra sarı kartla cəzalandırılan başqa qayda pozuntusu etdikdə oyundan qovulmalıdır. Oyun cərimə ilə bərpa olunur.

30. Oyunçu oyundan qovulduqda hakim ona qırmızı kart göstərir və həmin oyunçu matçda daha iştirak etmir. Oyundan qovulmuş oyunçu əvəz edilə bilməz.

Yalnız elit reqbidə: Qəsdən edilmiş və yüksək dərəcədə təhlükəli hərəkətlərə görə oyundan qovulmuş oyunçu əvəz edilə bilməz. Digər hərəkətlərə görə oyundan qovulmuş oyunçu 20 dəqiqəlik oyun vaxtından sonra əvəz edilə bilər.